“Mimoza Llastica” dhuron respiratorë për spitalin “Shefqet Ndroqi”

Aktorja shqiptare, Zhaklina Dhimojani Blättler, e cila njihet gjerësisht për publikun shqiptar me rolin e saj te filmi “Mimoza Llastica”, ka dhuruar përmes ambasadës shqiptare në Bern disa respiratorë për spitalin universitar “Shefqet Ndroqi”, në ndihmë të të prekurve me Koronavirus.

Ambasada e Shqipërisë në Bern i ka shprehur mirënjohje aktores për gjestin e saj human, e cila edhe pse u largua nga Shqipëria për të jetuar në Zvicër në vitet 90-të, ende vijon të kontribuojë për vendin e saj.

“Ambasada e RSH në Bernë i shpreh falenderime dhe mirënjohje Z. Blättler, që gjatë këtyre viteve në Zvicër ka dhënë ndihmën e saj në fushën sociale, ka promovuar artin dhe kulturën tonë në Diasporë dhe ka kontribuar me donacione të ndryshme për Bashkinë e qytetit të Himarës, prej nga ajo ka origjinën”, thuhet në mesazhin e ambasadës.