“Nuk e kisha të lehtë për të vendosur. Pas një kohe të gjatë, që kam luajtur me grup-moshat e Shqipërisë, si edhe me kombëtaren, e cila ka përfaqësuar të gjithë shqiptarët, brenda dhe jashtë trojeve, dua të them se ky vendim nuk është kundër Shqipërisë. Më tepër është një zgjedhje për Kosovën, mbasi unë aty kam lind dhe jam rrit. Dua që në hapat e parë të përfaqësueses së Kosovës të jap kontributin tim. Ky vendim me siguri nuk do t’iu pëlqejë të gjithëve. Shpresoj që të ketë një mirëkuptim nga ana e tifozëve dhe drejtuesit e FSHF-së.
Dëshira personale do të ishte që një ditë të kishim një kombetare të përbashkët dhe unë të isha pjesë e saj. Për arritjen e kësaj ëndrre duhet të punojmë të gjithë shqiptarët së bashku. Ju falënderoj të gjithë tifozëve shqiptarë për mbështetjen! Jam krenar që pata mundësinë për të luajtur me ngjyrat kuq e zi.” Ky është statusi i hedhur në Facebook nga Milot Rashica, si një shpjegim dhe justifikim për zgjedhjen që ka bërë, duke lënë Shqipërinë për Kosovën.
Kuptohet, brenda këtyre radhëve ka jo pak diplomaci, flitet për mirënjohje e vështirësi në marrjen e vendimit, por në fakt mosshkuarja në “Euro 2016” është thyerja e madhe e tij me De Biazin, madje edhe e menaxherit, Altin Lala, ish-kapitenit kuqezi, që ka diskutuar për këtë gjë në Austri, ku po përgatitej Shqipëria për Europianin e Francës, me trajnerin italian, duke e paralajmëruar për rrugën që do të ndiqte talenti i Shpresave.
