Kina po harton një plan për të dërguar mbi 10 milionë studentë dhe nxënës të shkollave të mesme për të jetuar në fshatra, me qëllim për të zhvilluar edhe zonat rurale nga pikëpamja teknologjike, kulturore dhe mjekësore.
Plani është propozuar nga Lidhja e Rinisë Komuniste Kineze, organizata më e rëndësishme rinore e vendit. Nëse gjithçka miratohet, plani do të fillojë të zbatohet në vitin 2022, me qëllim për të ndihmuar disa nga zonat më të varfra të Kinës.
Sipas këtij projekti, studentët do të jetojnë në fshat gjatë pushimeve verore dhe shërbimet e tyre do t’i ofrojnë falas. Zëdhënësi i Lidhjes Rinore Komuniste të Kinës, Zhao Yue ka thënë për “Global Times” se plani synon të ndihmojë zonat rurale kineze, pasi profesionistët e rinj duhet të luajnë një rol kyç në rritjen ekonomike të fshatrave.
Nga shumë skeptikë, ky shihet si një plan i ngjashëm me “Revolucionin Kulturor” të Mao Cedunit, kur më 1966 shumë të rinj u dërguan për të jetuar në fshatra./Opinion.al
