Rikonstruksioni i sheshit Skënderbej do të kushtojë mbi 1.7 miliardë lekë. Qeveria ka miratuar së fundmi përmes Komitetit të Zhvillimit të Rajoneve fondin për fazën e dytë të punimeve me vlerë 1.2 miliardë lekësh.
KZHR-së, një institucion kontrovers që menaxhon një pjesë të rëndësishme të fondit të investimeve publike, ka miratuar me vendim nr.45 edhe 10 projekte të tjera të ngjashme në qytetet Kurbin, Fushë Arrëz, Lushnjë, Tepelenë, Përmet, Vlorë e Selenicë, me vlerë totale prej 2.2 miliardë lekësh, raporton BIRN.
Tenderi për fazën e parë të punimeve tek “Skenderbej” u zhvillua në muajin gusht dhe u fitua nga e vetmja kompani që hodhi një ofertë financiare, “Fusha” sh.p.k.
Punimet nisën në shtator duke shkaktuar bllokime trafiku dhe ankesa nga qytetarët. Pas fillimit të punimeve të fazës së dytë, sheshi “Skënderbej” do të mbyllet tërësisht për trafikun për t’u kthyer në hapësirë për këmbësorët.
Nuk është e qartë se çfarë e ka shtyrë qeverinë të shpenzojë kaq shumë para për të rindërtuar një shesh që është ndërtuar vetëm pak vite më parë.
Qeveria është vënë vazhdimisht nën kritika për përdorimin e institucionit të njohur si Komiteti i Zhvillimit të Rajoneve, për të shpërndarë fonde pa kurrfarë transparence paraprake, në përgjithësi për bashkitë e kontrolluar nga qeveria qendrore.
Kritikat për vetë ekzistencën e Komitetit janë të shumta pasi, megjithëse supozohet se bashkitë konkurrojnë për të përfituar fonde nga ky institucion, vendimmarrja në të është tërësisht jo transparente, ndërkohë që kontrolli i përket efektivisht vetë qeverisë, pasi Komiteti drejtohet nga kryeministri dhe në përbërje të tij janë në shumicë dërrmuese ministrat e kabinetit të tij, raporton BIRN.
*Në foto: projekti i sheshit
