Detaje të reja janë zbardhur nga dosja hetimore e ish-punonjëses së Bankës së Shqipërisë, Milena Deraj.
Ajo ka rrëfyer se është kërcënuar nga familja Ferracaku pasi iu mori një shumë parash prej 340 mijë euro me premtimin se do t’i ndihmonte në një proces gjyqësor që kishin në Shkodër, në lidhje me një ngjarje kriminale të ndodhur në Velipojë, në vitin 2021. Deraj u premtoi personave në fjalë heqjen e dy burgimeve të përjetshme.
“Jam kërcënuar me pistoletë në kokë, me datë nga 12 maj, nga personat që u kishte marrë paratë për të mbyllur çështjen e dënimeve të përjetshme. Jam dërguar me makinë nga rruga e Ambasadave në Shkodër. U detyrova të bëj video me përmbajtjen: “E quajtura Milena Deraj kam marrë shumën prej 520 mijë eurosh nga Hamza Ferracaku”.
Ndërkaq gjatë seancës së sotme Milena Deraj ka kërkuar që t’i mbrojnë familjen e saj.
“Ju lutem më mbroni familjen, burrin dhe fëmijën. 4 banda na kërcënojnë me jetë. I kam marrë paratë, por do ti ktheja”, ka thënë ajo.
Përveç këtij rasti 30-vjeçarja kishte mashtruar edhe shoqen e saj duke i marrë 230 mijë Euro me premtimin se do t’i investonte paratë në bono thesari. Vetë shoqja e 30-vjeçares kuptoi që po mashtrohej nga Milena dhe e denoncoi në polici.
Në seancën e sotme Gjykata e Posaçme ka vendosur masën e sigurisë “Arrest me burg”, për 30-vjeçaren.
