Sot në Milano të Italisë është zhvilluar një marshim kundër racizmit dhe diskriminimit, ku sipas organizatorëve kanë marrë pjesë rreth 200 mijë persona nga e gjithë Italia. Marshimi është karakterizuar nga muzika, flamujt italianë dhe ato të komuniteteve të diskriminuar si LGBTQ dhe sloganet politike.
Ky organizim vjen në një moment kur politikat e Zëvendëskryeministrit dhe njëherazi Ministrit të Brendshëm italian Matteo Salvini janë kundër emigrantëve. Në marshimin e Milanos kanë marrë pjesë shumë politikanë të majtë si dhe figura publike të artit dhe kulturës.
“Politikën mos ia lini në dorë vetëm politikanëve, jeni dëshmia më e mirë që Italia nuk është vendi që përshkruhet”, ka thënë para turmës kryebashkiaku i Milanos Giuseppe Sala.
Edhe këngëtarja e njohur Ornella Vanoni është shprehur se Milano duhet të bëhet një qytet multietnik. “Pse gjithë kjo urrejtje? Shpresoj që ky manifestim të ketë një kuptim, jemi këtu për të thënë se nuk jemi racistë. Një qytet i rëndësishëm si Milano duhet të bëhet multietnik si Parisi apo Nju Jorku”, është shprehur ajo./Opinion.al
