Në një intervistë të publikuar nga “Gazzetta Dello Sport”, braziliani Pele, që nga shumë specialistë konsiderohet si më i madhi i të gjitha kohërave, deklaroi se në vitet ’60 ka pasur një ofertë nga Milan. “Në atë kohë kishte disa klube spanjolle dhe Milan në Itali që më donin,” – ishte fraza ekzakte e “O’Rei”, që ishte kontaktuar nga Andrea Rizzoli, presidenti pasanik i Milan të atyre viteve, por nga ana tjetër, presidenti i nderit të Inter, Massimo Moratti, tregon se ka qenë babai i tij, Angelo Moratti, kishte arritur marrëveshjen me klubin e Santos për të marrë Pele, pas Kupës së Botës 1958, por presioni i madh i tifozëve bëri që pala braziliane të ndryshojë mendim.
Massimo Moratti tregon diçka që e di nga babai i tij: “Babai im kishte firmosur një kontratë me Pele, pas Kupës së Botës 1958, por nga ana tjetër e telefonit presidenti i Santos kishte marrë disa kërcënime me jetë dhe presione politike që e detyronin ta prishin marrëveshjen. Jam i sigurt se ka qenë Inter klubi i parë italian i interesuar për Pele. Gjithçka u bë brenda rregullave, por transferimi dështoi vetëm në fund me lutjet e presidentin të Santos, që gjithashtu kishte firmosur.
Babai im e toleroi me mirëkuptim sepse situata rreth numrit 1 të klubit brazilian ishte shumë e rëndë. Jam i sigurt se Pele ka qenë shumë pranë kalimit te Inter.”
