Qendra e Londrës është mbushur nga mijëra protestues të cilët bëjnë thirrje kundër zgjedhjes së Boris Johnson në postin e kryeministrit të ardhshëm të Britanisë së Madhe dhe pro qëndrimit të vendit në Bashkimin Europian.
Protestuesit duan një referendum të dytë për BREXIT. Tre ditë nga zgjedhja pothuajse e sigurt e Johnson si pasardhës i Theresa May në krye të Konservatorëve, mijëra persona po marshojnë drejt Londrës duke kërkuar ndryshimin me moton: “Jo Boris, Po Europës”.
Në shenjë simbolike shumë protestues ishin maskuar si Johnson me paruke të verdha dhe me flamuj të Bashkimit Europian në duar, ndërsa një kukull më e madhe e mbushur me ajër me pamjen e Boris Johnson fluturonte para parlamentit.
Kërkesa kryesore është një mundësi e dytë për të votuar për daljen ose jo të Britanisë nga BE. Retorika se mund të ketë një dalje pa marrëveshje i ka rritur tensionet në vend pasi ky skenar parashikohet të ketë pasoja të rënda ekonomike kryesisht për qytetarët e Mbretërisë së Bashkuar. /Opinion.al
