Mijëra qytetarë protestuan në Beograd, pas thirrjes së studentëve, të cilët, për më shumë se katër muaj, kërkojnë përgjegjësi penale dhe politike për tragjedinë në Novi Sad.
Turma në Sheshin Sllavija të Beogradit nisi të shpërndahej, pasi studentët që organizuan protestën, njoftuan se ajo ka përfunduar.
Qytetarët e tubuar në Sheshin Sllavija të Beogradit mbajtën në orët e mbrëmjes 15 minuta heshtje për 15 viktimat e tragjedisë në Novi Sad.
Pesëmbëdhjetë persona humbën jetën nga shembja e një strehe në Stacionin Hekurudhor të Novi Sadit, më 1 nëntor të vitit të kaluar.
Që nga ajo kohë, studentët të mbështetur edhe nga akademikë dhe qytetarë të tjerë, organizojnë protesta dhe bllokojnë fakultete duke kërkuar transparencë dhe përgjegjësi nga qeveria e presidentit Aleksandër Vuçiç.
