Vetëm pak ditë më parë këngëtarja e njohur Beyonce publikoi albumin e saj më të ri muzikor dhe gjithashtu u transmetua filmi dokumentar “Homecoming”i dedikuar asaj nga’Netflix’. Mes reagimeve të shumta pozitive që diva e muzikës ka marrë, një mesazh special i ka ardhur nga ish-zonja e parë e SHBA-së, Michelle Obama.
Ajo ka publikuar një video në Twitter ku shpreh gjithë dashamirësinë e saj për Beyoncen dhe se ishte e bindur në suksesin e këngëtares në çdo gjë që ajo bën.
“Kaq krenare për vajzën time. Mbretëresha ia doli përsëri. Beyonce, faleminderit që gjithmonë jeton të vërtetën tënde”, -ka shkruar krahas videos Michelle.
Gjithashtu ajo ka dhënë edhe një mesazh të plotë në video ku thekson se Beyonce është duke frymëzuar gjeneratën e re të krijuesve të historisë dhe të atyre që thyejnë rekordet, që do të udhëheqin botën në vitet e ardhshme.
“Mbretëreshë! Ti ia dole sërish. Do të thosha që jam e surprizuar, por e di se kush je ti. E kam parë nga afër dhe personalisht. Më bën kaq krenare dhe të dua. Gjithashtu më pëlqen që filmi yt i ri në ‘Netflix’, ‘Homecoming’, na informon për liderët, mendimtarët dhe poetët me ngjyrë, që kanë hapur rrugën për njerëzit si ne. Më pëlqen që është njëherësh edhe diçka për t’u festuar por edhe një thirrje për të vepruar. Më pëlqen që po e përdor këtë për të frymëzuar gjeneratën e re të krijuesve të historisë dhe të atyre që thyejnë rekordet, që do të udhëheqin botën në vitet e ardhshme. Pra për ju, miqtë e mi, thjesht dua të them: Vazhdoni të thoni të vërtetën. Sepse mund ta bëni në një mënyrë që askush tjetër nuk mundet”,-përfundon Obama video-mesazhin e saj./Opinion.al/
