Dy gazetarët e agjencisë Reuters të burgosur në Mianmar lidhur me raportimet e tyre për komunitetin mysliman Rohingya, u liruan ditën e sotme.
Wa Lone, 33 vjeç dhe Kyaw Soe Oo, 29 vjeç, u dënuan për shkeljen e Aktit të Sekreteve Zyrtare të Mianmarit, me shtatë vjet burgim shtatorin e kaluar, por u liruan në bazë të një amnistie presidenciale vjetore.
Ata zbuluan se forcat e sigurisë së shtetit ekzekutuan dhjetë myslimanë Rohingya në vitin 2017, kohë kur gazetarët po mbulonin fushatën ushtarake në shtetin Rakhine që dëboi rreth 700 mijë myslimanë Rohingya përtej kufijve në Bangladesh.
Gazetarëve iu refuzua apeli nga disa gjykata, ndërsa SHBA dhe disa fuqi perëndimore kanë bërë edhe më herët thirrje për lirimin e tyre, por qeveria e Mianmarit, iu është kundëpërgjigjur duke ndaluar gazetarët dhe vëzhguesit ndërkombëtarë që të udhëtojnë në zonë në mënyrë të pavarur.
Arrestimi i Wa Lone dhe Kyaw Soe Oo, shkaktoi zemërim ndërkombëtar midis aktivistëve të lirisë së shprehjes dhe të të drejtave të njeriut, të cilët e panë rastin si sprovën e parë reale për lirinë e shprehjes në Mianmar, pas përqafimit të demokracisë në vitin 2016, pas dekadash nën sundimin ushtarak represiv.
Gazetarët kanë fituar çmimin Pulitzer për raportim ndërkombëtar lidhur me publikimin e masakrës, çmim që ata e ndanë me dy kolegë të tjerë, të cilët e përfunduan materialin pas dënimit të tyre./Opinion.al
