Gjykata e Tiranës ka caktuar masën e sigurisë “Arrest me burg” pa afat për 30-vjeçarin kosovar Qerim Krasniqin, i cili akuzohet për veprën penale “Mashtrimi”.
Ai është akuzuar nga shtetasja Marjana C., banuese në Tiranë se i ka marrë përmes mashtrimit shumën e 135 mijë eurove.
30-vjeçari është arrestuar dje nga Policia e Tiranës, e cila informoi se shtetasi Qerim Krasniqi i ka marrë një shumë parash një shtetasje nga Tirana me pretendimin se do t’i investonte në ngritjen e një call center-i.
Mësohet se para hetuesve, Qerimi ka thënë që Marjanës i ka marrë shumën prej 80 mijë eurosh, të cilën e ka investuar në kriptomonedha, por e ka humbur.
Marjana dhe 30-vjeçari nga Kosova janë njohur vitin e kaluar, ku ajo është pronare e një hoteli të vogël ku ai kishte qëndruar si klient. Me atë ka krijuar një marrëdhënie të ngushtë dhe i ka kërkuar para.
Gruaja i ka dhënë fillimisht 50 mijë euro, pastaj 20 derisa sipas saj, shuma në total ka shkuar 135 mijë euro. Mësohet se ajo i ka kërkuar pas paratë, por ai nxirrte justifikime nga më të ndryshmet dhe në shtator të 2021 Qerim Krasniqi i ka ndërprerë kontaktet me të.
Kjo ka bërë që Marjana të shkojë në polici dhe të bëj një denoncim kundër 30-vjeçarit.
Hetimi për 30-vjeçarin me vendbanim në Kamenicë ka nisur prej 2021 dhe ka dyshime se veç shumës prej 135 mijë euro, Krasniqi ka përfituar shuma të tjera monetare, nga shtetas të ndryshëm në Republikën e Shqipërisë./Opinion.al
