Komisioni Europian prezantoi këtë të mërkurë metodologjinë e detajuar të zgjerimit në Komitetin e Politikave të Jashtme në Parlamentin Europian, e cila do të jetë e aplikueshme për Shqipërinë dhe Maqedoninë e Veriut.
Ish-ministri i Jashtëm, Ditmir Bushati u shpreh se dekada e katërt e tranzicionit duhet të përmbyllet me Shqipërinë anëtare me të drejta të plota në familjen evropiane.
Bushati shprehet i bindur se metodologjia e rishikuar do ta bëjë procesin e pranimit në Bashkimin Europian më efektiv, më të besueshëm dhe më të prekshëm për qytetarët.
“Dy vjet pas miratimit të Strategjisë së Zgjerimit të vitit 2018, le të shpresojmë që metodologjia e rishikuar do ta bëjë procesin e pranimit në Bashkimin Europian më efektiv, më të parashikueshëm, më të besueshëm dhe më të prekshëm për qytetarët duke frymëzuar ndryshimet e duhura shoqërore. Javët në vijim do të jenë kritike për zyrtarizimin e bisedimeve për anëtarësim ndërmjet Shqipërisë dhe BE-së. Ndaj, na duhet të shtojmë forcat e përpjekjet mes nesh, të gjithë aktorëve politikë e shoqëror, për të jetësuar këtë objektiv kombëtar. Dekada e katërt e tranzicionit, që shkoi përtej çdo parashikimi, duhet të përmbyllet me Shqipërinë anëtare me të drejta të plota në familjen europiane.”/ Opinion.al
LEXO EDHE- Prezantohet metodologjia e re e zgjerimit, lajm i mirë për Shqipërinë
