Kujtim Cakrani, avokati i ish-presidentit të Republikës, Ilir Meta ka folur për mediat pas daljes nga ambientet e SPAK, ku klientit të tij i është komunikuar zyrtarisht aktakuza lidhur me çështjet CEZ-DIA dhe lobimin e ish-LSI-së.
Gjatë fjalës së tij, Cakrani tha se nuk ka asnjë gjë të re për çështjen CEZ-DIA apo për lobimin.
“Nuk ka asnjë gjë të re për çështjen CEZ-DIA apo për lobimin. Zoti Meta ka dhënë shpjegimet e tij dhe ka kërkuar nga prokuroria hetime të thelluara për të zbuluar kush ka kryer pagesat. Ata s’kanë asnjë informacion për këtë,” deklaroi Cakrani.
Më tej, avokati u shpreh se nga ana e mbrojtjes është ngritur vazhdimisht shqetësimi për mungesën e provave konkrete që të lidhin Metën me akuzat për pastrim parash apo korrupsion.
“Akuzat janë thuajse të rrënuara. Çështja CEZ-DIA ka prej vitesh që hetohet dhe tani është përmbledhur në vetëm 30 faqe. Ndërkohë që ne kemi 116 fashikuj, afro 60 mijë faqe dokumente dhe prova që tregojnë se zoti Meta nuk ka asnjë pasuri të paligjshme, asnjë gjurmë korrupsioni.
Meta ka zero korrupsion dhe zero pasuri të vendosur nga korrupsioni.
Nga ana ligjore ne do të ndjekim çdo procedurë të rregullt. Por kjo çështje nuk mund të ndahet nga aspekti politik, është e qartë që kemi të bëjmë me një proces të ngarkuar politikisht”, përfundoi Cakrani.
