Prej disa ditësh Shqipëria është përfshirë nga moti i keq, i cili ka shkaktuar përmbytje në disa zona të vendit, ndërsa shumë rrugë janë dëmtuar.
Por mesa duket moti i keq do e shoqërojë edhe këtë javë vendin tonë. Meteorologia Adiola Bani nga MeteoAlb u shpreh se kjo javë do të sjellë mot të acartë dhe reshje bore në disa zona të vendit.
Bani tha në një intervistë për “Abc News” se do të ketë reduktim të reshjeve dhe një mot më të qëndrueshëm ndërsa fundjava do të sjellë rënie të temperaturave dhe reshje të izoluara dëbore kryesisht në zonat malore.
“Do të ketë përmirësim jo vetëm në zonat qendrore dhe jugore ku ka patur shumë më pak reshje gjatë mëngjesit së sotëm dhe gjatë ditës kemi reshje të pakta dhe të izoluara. Veriu mbetet pak problematik gjatë paradites, ndërsa pasditja sjell përmirësim të motit, herë pas here do të kemi intervale me kthjellime dhe reshjet do të jenë në sasi më të pakët. Nesër do të ketë më pak reshje me shumë intervale me kthjellime, ndërsa e mërkura dhe deri në fundin e javës sjell një mot më të qëndrueshëm por temperatura të rëna ndjeshëm. E premtja dhe fundjava sjellin mot të acartë dhe temperatura shumë të ulta sidomos në zonat malore. Për shkak të lagështirës së lartë, reshjet që do të bien do të jetë dëborë dhe pse jo në të gjithë territorin. Për vendet e rajonit aktualisht mbeten me reshje dëbore. Kryeisht një pjesë e Malit të Zi, Kosova dhe një pjesë e mirë e Maqedonisë mbeten me reshje dëbore sot dhe nesër dhe pse jo në sasi shumë të madhe. Presim të ketë përmirësim të motit nga e mërkura por rënie të ndjeshme të temperaturave të ajrit.”, është shprehur Bani. / Opinion.al
