Kreu i Kuvendit Ilir Meta ka folur nga salla e Kuvendit ku po mbahet seanca për miratimin e ligjit të vettingut, duke kërkuar që ky ligj të votohet me patjetër sot pasi sipas tij, Kuvendi është i vonuar në këtë proces.
Ai ka kërkuar që ndryshimet kushtetuese të miratohen bashkë me opozitën.
Meta pohoi se nuk i duket bindës qëndrimi i opozitës lidhur me kundërshtitë që ajo shfaq për procesin në fjalë.
“Unë dua t’ju rikujtoj se jemi shumë vonë për ligjin për Vettingun në raport me procesin e reformës, por në mënyrë të veçantë në raport me plotësimin e detyrimeve tona në kuadër të procesit të integrimit evropian. Jo vetëm ky ligj, por edhe dy ligje të tjera normalisht duhet të raportoheshin më datë 1 shtator si të miratuar nga Kuvendi i Shqipërisë.
Prandaj, më vjen keq që gjithë kjo kohë që u dha në maksimum disa javë, nuk u shfrytëzua me efektivitetin e duhur. Askush nuk na siguron që kur nuk arritëm konsensus për këtë ligj për disa javë, të mund ta arrinim për disa orë. Do të ishte mrekulli ta miratonim mesnatën e 30 dhe 31 gushtit”.
