Debati për ndryshimet e Kodit Penal të miratuara në Kuvend dhe të dekretuara nga Presidenti ka ngritur pikëpyetjet e një marrëveshjeje të re mes këtij të fundit dhe kryeministrit Rama. Për disa, ndryshimet e bëra në Kod ishin jo kushtetuese dhe ata akuzuar presidenti për një qëndrim jo koherent duke iu referuar aksionit të tij politik që nga zgjedhjet e qershorit të kaluar e që kulmoi me tubimin e 2 marsit.
Presidenti e justifikoi dekretimin e propozimeve të qeverisë duke thënë se ato ishin të nevojshme në një kohë të tillë të jashtëzakonshme dhe se kishte një boshllëk në legjislacionin shqiptar sa i përket gjendjes së epidemisë dhe karantinimit të popullsisë. Ai shton se në këtë proces janë marrë parasysh edhe rekomandimet e tij të cilat u votuan gjithashtu në Kuvend. Këto arsye Presidenti Meta i shpalos edhe në një përgjigje për gazetarin Fatos Lubonja i cili në një shkrim ishte treguar skeptik lidhur me juristët e presidentit.
Megjithatë në përgjigjen e Presidentit Meta ajo që bie në sy është se ai cilëson një nga sfidat madhore që kërkon përgjigje në Shqipëri është tronditja e shtetit ligjor duke i dhënë kështu një përgjigje sa i takon qëndrimit të tij në lidhje me qeverinë.
“Ndajmë të njëjtat dyshime e shqetesime të forta me Lubonjën për tronditjen e shtetit ligjor në Shqipëri, si një sfidë madhore që kërkon përgjigje”, shkruan Meta.
Përgjigjia e plotë e Presidentit Ilir Meta
Meqënëse z.Fatos Lubonja sot ka bërë disa pyetje për juristët e Presidentit të Republikës, preferoj t’i përgjigjem drejtpërdrejt në respekt të kontributeve të Tij të spikatura prej dekadash në mbrojtje të demokracisë dhe interesit publik.
Ndryshimet e detyruara të Kodit Penal për pandeminë, ishin një reflektim ligjor ndaj një të papriture, që surprizoi e tronditi globin në çdo pikëpamje.
Realiteti pozitiv është që ndryshimet e bëra janë të një standardi të njëjtë me legjislacionet më të mira demokratike. Ngjashmëria me Danimarkën është shteruese, qoftë për garancinë juridike, ashtu edhe për proporcionalitetin dhe ky është lajm i mirë për këdo.
Por edhe dyshimi beninj i Lubonjës është i natyrshëm dhe i motivuar. Ky dyshim lidhet qartë me zbatimin e drejtë dhe korrekt të legjislacionit, që do të thotë në esencë funksionim i shtetit ligjor.
Ndajmë të njëjtat dyshime e shqetesime të forta me Lubonjën për tronditjen e shtetit ligjor në Shqipëri, si një sfidë madhore që kërkon përgjigje.
Në këtë situatë, më mirë të kemi një legjislacion sa më solid, të qartë dhe garantues të parimeve të sigurisë juridike dhe proporcionalitetit sipas Kodit Penal të Danimarkës, sesa të kemi një boshllëk ligjor që mbushet vetëm me abuzivizëm dhe arbitraritet apo më keq se sa të kishim ndryshime jashtë çdo standardi demokratik që cënonin të drejtat e qytetarëve tane duke i ekspozuar ndaj abuzivizmit dhe represionit. /Opinion.al
