Presidenti i Republikës, Ilir Meta ka pritur sot në një takim gazetarin e “Report tv”, Julian Shota, i cili ka denoncuar se është kërcënuar me jetë në Laç teksa ka qenë duke raportuar për një ngjarje kriminale.
Përmes një njoftimi për mediat, zyra e shtypit tha se “gazetari e informoi Presidentin Meta për rrethanat në të cilat ndodhi ngjarja”.
Sakaq, Meta ka deklaruar se dënon me ashpërsi rastet tronditëse të ndodhura së fundmi, të kërcënimeve dhe agresioneve ndaj gazetarëve.
“Inkurajoj gazetarin Shota dhe të gjithë gazetarët të vijojnë misionin e tyre me guxim, pa u trembur dhe shantazhuar nga askush. Shpreh solidarizimin tim të plotë me të gjithë komunitetin e gazetarëve”, ka thënë ai.
Po kaq, Meta ka bërë apel që policia dhe prokuroria të veprojnë me shpejtësi për hetimin e zbardhjen e autorësisë dhe motiveve të këtyre sulmeve ndaj gazetarëve. “Çdo vonesë në zbardhjen e sulmeve ndaj tyre do të ndikojë negativisht në klimën e lirisë së shprehjes në Shqipëri. Kërcënimi me jetë i gazetarit, Julian Shota, sulmi me armë ndaj banesës së prindërve të gazetares, Klodiana Lala dhe moszbulimi i autorëve të rrahjes barbare së gazetarit, Elvi Fundo, janë ngjarje tepër të rënda”, ka thënë kreu i shetit.
Raportimet se të paktën 12 gazetarë kanë kërkuar azil në vendet e BE-së dhe SHBA për shkak të rreziqeve të punës, ndërsa 34 të tjerë kanë kërkuar shtetësi në vende të tjera, janë tronditëse. Liria e medias është kusht i pazëvendësueshëm për garantimin e të drejtave të njeriut në një shoqëri demokratike, ka vijuar ai.
