Kryetari i parlamentit, Ilir Meta, ka takuar sot, në ditën e tretë të vizitës në Greqi, Kryeministrin Alexis Tsipras. Ndër të tjera është folur edhe për çështjen çame edhe pse Meta duket se nuk e ka artikuluar në ligjëtarë të drejtë. Referuar një njoftimi për shtyp nga zyra e Kuvendit, mësohet se Meta është shprehur gjatë takimit me Tsipras se:
“Natyrisht, si të gjithë fqinjët, në historinë e marrëdhënieve tona kemi disa plagë, por nuk janë këto që dominojnë marrëdhëniet tona. Ato dominohen nga interesat e përbashkët, dhe dihet që një plagë edhe kur e përkëdhel, prapë e lëndon. Por unë besoj që ne me urtësi dhe me vullnet pozitiv, jo vetëm që do t’i japim një hov të ri marrëdhënieve të gjithanshme shqiptaro-greke, sepse kjo është një kërkesë e qytetarëve tanë, por dhe t’i trajtojmë në mënyrë konstruktive sipas edhe përkatësisë evropiane që na takon të gjitha çështjet e mbartura nga e kaluara”, është shprehur Meta.
Lidhur me këtë temë, Tsipras është shprehur se: “Marrëdhënia mes dy vendeve gjatë rrugëtimit historik ka pasur edhe tensione, kanë pasur edhe probleme, por ka pasur edhe kohërat e mira. Dhe ne duhet të zgjidhim problemet dhe të kenë mbarëvajtjen e tyre. Duhet të mbrojmë perspektivën e fqinjësisë së mirë, ta mbrojmë atë nga zërat ekstremistë, nacionaliste”.
Ndërsa gjatë takimit është folur edhe për emigrantët shqiptarë në Greqi. Kryeministri Tsipras ka premtuar se qeveria greke do të angazhohet për të krijuar më shumë lehtësira për dokumentet e emigrantëve shqiptarë.
