Presidenti Ilir Meta ka kthyer në Kuvend ligjin për “statusin e gjyqtarëve dhe prokurorëve”. Sipas tij, ky ligj shkel pavarësinë e gjyqësorit dhe sigurinë juridike.
Meta thot se në tërësi ky ligj, karakterizohet nga një teknikë e dobët legjislative, që i bën dispozitat konfuze dhe të paqarta. Ky element, ndërthurur me antikushtetutshmërinë e parashikimeve, cenon akoma më rëndë parimin e sigurisë juridike.
Ky ligj është miratuar në seancën plenare të 12 shkurtit, ndërsa në arsyetimin e Presidentit për kthimin e tij në Kuvend thuhet se dispozitat e miratuara në mungesë konsultimi gjithëpërfshirës shkelin: Parimin e sigurisë juridike; Parimin e pavarësisë dhe paanësisë së gjyqësorit; Parimin e hierarkisë së normave kushtetuese dhe rezervën kushtetuese; Jurisprudencën e Gjykatës Kushtetuese.
Meta thotë se ndryshimet ligjore të miratuara nuk kanë marrë në konsideratë hierarkinë e normave juridike, veprim të cilin ai e konsideron të “kryer me qëllimin e qartë të devijimit të Kushtetutës, për sa kohë nuk ka Gjykatë Kushtetuese funksionale për të mbrojtur këta parime”.
Në arsyet e parashtruara, Kreu i Shtetit thekson se parashikimet e ligjit, zgjerojnë në “mënyrë antikushtetuese” kompetencat e ILD-së, tejkalojnë kërkesat kushtetuese dhe u mungon qartësia.
Vendimi i Metës vjen dy ditë pas dekretit që firmosi gjatë manifestimet të dy marsit për kthimin e ligjit për betimin e anëtarëve të Gjykatës Kushtetuese.
Më tej, Kreu i Shteti i bën thirrje Kuvendit për reflektim, teksa shkruan: “Ju ftoj të reflektoni, për të mos u kthyer në shkelës serialë të Kushtetutës së shenjtë të vendit tonë”! / Opionion.al
