Presidenti, Ilir Meta i ka bërë sërish sot thirrje kryeministrit Rama që të respektojë marrëveshjen e 5 qershorit, përndryshe do të ketë përballë tre milionë shqiptarë “të shkalluar” në 25 prill.
Në një postim në Facebook, presidenti sjell disa momente nga fjalimi i tij si president para Kuvendit.
Në mesazhin e tij Meta thekson se para pushtetit dhe demokracisë ka zgjedhur gjithmonë demokracinë dhe nënvizon faktin se ka mbajtur çdo premtim për mbrojtjen e Kushtetutës dhe interesit kombëtar.
“Meqënëse Kryepinoku Rilindas u justifikua për zgjedhjen e detyruar para tre vitesh të “Presidentit të shkalluar”, më duhet t’ju kujtoj të gjithë socialistëve se Ilir Meta ka mbajtur çdo premtim për mbrojtjen e Kushtetutës dhe interesit kombëtar. Unë u kam bërë të qartë se midis Pushtetit dhe Demokracisë, kam zgjedhur gjithmonë Demokracinë se pushtet ka edhe në vendet jodemokratike, ku të drejtat e qytetarëve shtypen e dhunohen. Tani ju e kuptoni se çdo njeri që nuk blihet e frikësohet prej tij është “i shkalluar”. Bën mirë të reflektojë dhe të respektojë 5 Qershorin se përndryshe në 25 Prill do të ketë jo vetëm një President “të shkalluar”, por edhe tre milionë shqiptarë “të shkalluar” që do shkallmojnë me votë dhe çdo mjet legjitim ëndrrat e tij për të blerë e trembur popullin shqiptar për një grusht oligarkësh e banditësh.”, shkruan Meta./Opinion.al
