Presidenti Ilir Meta ka reaguar sërish, këtë herë për tensionet që kanë ndodhur në Shkodër dhe në Tropojnë në lidhje me procesin zgjedhor. Nëpërmjet zëdhënësit të tij, kreu i shtetit thekson se “vlerëson të gjitha institucionet që zbatojnë ligjin dhe i inkurajon që ta bëjnë këtë me përgjegjshmëri maksimale dhe transparencë të plotë”.
“Presidenti mban shënim të gjithë personat që shkelin ligjin dhe provokojnë tensione artificiale, të cilat u shërbejnë vetëm atyre grupimeve të errëta vendase dhe të huaja, që kërkojnë destabilitet në Shqipëri dhe rajon, me qëllim defaktorizimin e Shqipërisë dhe shqiptarëve”.
Ky reagim erdhi pasi KQZ, në një deklaratë për mediat theksonte se dekreti i Presidentit Ilir Meta për shfuqizimin e datës së zgjedhjeve është inekzistent.
“KQZ i bën thirrje të gjitha organeve publike që ngarkon ligji me detyra në kuadër të mbarëvajtjes dhe organizimit të zgjedhjeve vendore të datës 30 qershor 2019 të konsiderojnë si inekzistent aktin e Presidentit për shfuqizimin e dekretit dhe të vijojnë përmbushjen e detyrave të tyre për të garantuar të drejtën kushtetuese të shtetasve shqiptarë për të zgjedhur përfaqësuesit e tyre në pushtetin vendor”, deklaroi zëdhënësja e KQZ-së.
KQZ shprehet se kërkesa e disa kryebashkiakëve për lirim të KZAZ-ve është në tejkalim të kompetencave. KQZ gjithashtu thekson se të gjithë ata që bëjnë veprime të dhunshme në zgjedhje dënohen sipas Kodit Penal.
Persona të paidentifikuar thyen xhamat dhe dyert e më pas hoqën materialet zgjedhore që ndodheshin brenda ambienteve për KZAZ-në numër 9 në Tropojë. Më herët, Bashkia kishte marrë vendimin për lirimin e qendrave të KZAZ-ve, pas anulimit të zgjedhjeve të 30 Qershorit nga Presidenti.
Për të dytën ditë radhazi, tensione pati edhe në Shkodër, në KZAZ-në numër 2. Në ambientet e Pallatit të Sportit pati incident midis dy policive, asaj të rendit me atë bashkiake. Policia kërkoi të hapen ambientet e Pallatit të Sportit për të vendosur aty bazën materiale për zgjedhjet e 30 Qershorit, por kjo u kundërshtua nga Policia Bashkiake, e cila në nuk lejon që ky ambient të jetë i zënë për KZAZ./ Opinion.al
