Presidenti, Ilir Meta, teksa ka folur në lidhje me përplasjet politike në Shqipëri, është shprehur se kryeministri Edi Rama është i vetmi përgjegjës për situatën ku ndodhet vendi.
Meta ka thënë gjatë një interviste televizive, se Rama kërkon që përmes debateve të mbulojë dështimet e tij. Po ashtu, presidenti ka theksuar se kryeministri ka kapur të gjitha institucionet në vend duke përfshirë edhe mediat.
Meta ka thënë se debatin mes Shqipërisë dhe Kosovës po e përdor Serbia, për të krijuar pasiguri në arenën ndërkombëtare ndaj Kosovës.
“Tensioni në Shqipëri është i provokuar qëllimisht. Shqipëria është çdo ditë në tension, nga tensioni në tension, nga konflikti në konflikt. Tensioni qëndron te arbitrariteti për fat të keq i një individi që pavarësisht sesi, ka rrëzuar një sistem të tërë llogaridhënës dhe demokratik në vend të cilin e ka arritur me mjaft sukses gjatë vitit që po mbyllim. Të gjitha këto dështimet kërkon ti mbulojë duke krijuar dhe debate krejt të panevojshme, nuk është hera e parë. Është një strategji për të drejtuar dhe mbijetuar pa rregulla loje përmes kapjes së gjitha institucioneve, mediave, përmes presioneve, linçimeve të gjithë atyre që mendojnë ndryshe jo vetëm në Shqipëri por edhe Kosovë. Kemi të bëjmë me një defaktorizim dhe të Shqipërisë dhe shqiptarëve në terësi. Një Shqipëri që ka 4 vjet që bën hapa pas me BE, shtohen kushtet. Sigurisht nuk mund të jetë modeli më i mirë për gjithë shqiptarët në rajon dhe një Shqipëri që paraqitet në mënyrë të padrejtë me teza që në fund fare i përdor me mjeshtëri Serbia për të krijuar paqartësi, pasiguri në planin ndërkombëtar për të ardhmen e Kosovës, apo për ti paraqitur shqiptatët si revanshistë,-tha Meta./ Opinion.al
