Presidenti Ilir Meta edhe njëherë ka bërë thirrje që palët të gjejnë zgjidhje për krizën politike, përpara vendimit të tetorit që do të jap Bashkimi Europian në lidhje me negociatat.
I pyetur në lidhje me deklaratat e kryeministrit Edi Rama, i cili tha se nuk e njeh 13 tetorin, kreu i shtetit shqiptar deklaroi se ishte gati ta diskutonte këtë datë por jo duke e shtyrë pas datës kur do flasë BE (përpara 17-18 tetorit).
“Kam përshtypjen se kryeministri e percepton si ndoshta datë tersi 13 tetorin”, tha kreu i shtetit.
“Ne tani e kemi të artë provimin e qershorit e shtymë për në tetor, është e domosdoshme të jemi të sinqertë dhe të përgjegjshëm të paktën unë si president dhe si kryetar i Shtetit, zoti Rama si kryetar i mazhorancës aktuale dhe zoti Basha si kryetar i opozitës nëse deri në 17- 18 tetor nuk realizojmë zgjedhje lokale dhe të gjejmë një formulë për zgjidhen e krizës, provimi është i pakalueshëm. Jam gati ta rishikoj 13 tetorin, por përpara 17-18 tetorit, por e pres për një zgjidhje të përgjithshme pasi kjo krizë do vazhdojë dhe nuk do jetë me kosto zero”, deklaroi më tej kreu i shtetit.
Ai shprehu keqardhjen që nuk ishte gjetur një zgjidhje më parë, që kur ai zhdekretoi 30 qershorin dhe caktoi më pas një datë të re për zgjedhjet vendore.
“Shqiptarët nuk duan të dëgjojnë justifikimet e askujt për ping-pongun e kalimit të fajit. Jam fleksibël, meqenëse mund t’i ketë dalë ters në filxhan, është i mirëpritur për të dhënë një zgjidhje me një datë tjetër”, shtoi Meta.
“Çdo proces është demonstrim i rrëmujëhanes që po zhvillohet në vendin tonë, është rezultat i shkeljes së kushtetutës, kjo gjë u demonstrua shumë qartë që në momentin ku me një qarkore Kuvendi u shpall gjoja i pavlefshëm një dekret i Presidentit dhe u bë presion mbi Kolegjin Zgjedhor. Duhet të kenë të qartë të gjithë qytetarët shqiptarë se nuk ka pasur zgjedhje ligjore dhe kushtetuese në 30 qershor. Ta ketë të qartë çdo shqiptar dhe çdo ndërkombëtar që na thotë se gomari fluturon”.
Një ditë më parë, pas mbledhjes së gjatë të Kryesisë Socialiste, Edi Rama tha se për të, 13 Qershori është një e diel e zakonshme vjeshte. Zgjedhjet parlamentare janë në 2021, deklaroi i prerë, ndërsa ato lokale të 30 Qershorit vendosën drejtuesit e rinj të 61 bashkive./ Opinion.al
