Ashtu siç ishte lajmëruar presidenti Meta foli i fundit në manifestimin e së hënës.
“Po ju pyes? A ka ndonjë vend në NATO apo Europë pa gjykatë kushtetuese? A mund të luhet Tirana -Partizani pa arbitër? A ka ndonjë vend në NATO apo Europë pa Gjykatë të Lartë”? Kështu u shpreh Presidenti Meta në fjalën e tij gjatë mainfestimit të së hënës, ndërsa njoftoi se pas firmos së dekretit kundër ligjit për emërimet në Gjykatën Kushtetuese, ai do të firmosë shpërndarjen e parlamentit.
Pasi ka firmosur dekretin kundër ligjit të emërimit të anëtarëve të Gjykatës Kushtetuese, Ilir Meta ka paralajmëruar Ramën dhe mazhorancën, për shpërndarje parlamenti deri më 15 Mars.
“Nëse nuk e merrni seriozisht këtë dekret, që unë firmosa sot, unë ju jap fjalën përpara këtij flamuri, që pas datës 15 Mars, do të kthehem sërish për të firmosur atë dekretin tjetër. Por jo këtu, do të hyj në mes të parlamentit”, tha Meta duke puthur flamurin dhe duke kujtuar që ai është Komandant i Përgjithshëm i Forcave të Armatosura.
Pjesë nga fjala e Ilir Metës në manifestim
Zëri i popullit, zëri i Zotit
Presidenti i popullit kuq e zi, ulet në gjunjë vetem para flamurit kuq e zi dhe popullit kuq e zi. Para popullit të shqiponjave. Këta ta dëgjojnë mirë organizata mafioze që kërkon të shkatërrojë sovranitetin dhe kushtetën tuaj.
Neni 2 i kushtetës thotë: Sovraniteti në Republikën e Shqipërisë i përket vetëm popullit. Ndaj ju kam ftuar, jo si Ilir Meta por si presidenti juaj, si i vetmi institucion demokratik që ka mbetur në këtë shtet. Për të dëgjuar zërin tuaj, sepse kur institucionet bie, ngrihet populli. Jemi këtu për t’u vendosur kundër grushtit të shtetit, sepse presidenti i shteroi të gjitha përpjekjet institucionale dhe demokrtatike kundër grushtit të shtetit. Presidenti e ka thirrur popullin, sepse pasuria kombëtare është ajo që po u vidhet të gjithë shquiptarëve. Sepse sistemi i drejtësisë është kapur nga sekti antishtet.
Sepse financat publike po shterojnë dhe borxhet po rriten, sepse skandalet që njofton KLSH bien në vesh të shurdhët. Sepse ekonomia juaj është në ditët më të errëta. Sepse oligarkët kontrollojnë parlamentin njëpartiak. Ky nuk është shteti i drejtësisë por është një instrument shtypës, i disa puçistëve.
Populli nuk futet në xhep si paratë e oligarkëve. Shqipëria është e ndarë në botën e popullit kuqezi dhe në botën e errët të tradhtarëve dhe oligarkëve, të cilët pinë çdo ditë gjakun e popullit tonë
Ky gjysmë parlament është shëndërruar në një kukull të këtij sekti, pa fe, pa familje dhe pa atdhe.
Ata vrapuan që të zëvendësonin 182 deputetë dhe kandidatë në kundërshtim të plotë me kodin dhe ligjin edhe pse procedura kërkon 30 ditë kohë. Ata shkelën rregulloren dhe kushtetuën vetëm që të zëvendësonin opozitën në kuvend.
Nëse nga Kosova largohet sot 1 qytetar, nga Shqipëra largohen 5, nëse nga Serbia largohet 1 nga Shqipëria largohen 8, nëse nga Mali i Zi largohet 1, nga Shqipëria largohen 11.
Unë i kam denoncuar në mënyrë institucionale krimet e tyre, por drejtësia vazhdon të flejë, por në rast se drejtësia do kishte vepruar sot nuk do ishte e nevojshme që unë t’ju ftoja juve këtu. / Opinion.al
