Presidenti Ilir Meta ka publikuar në rrjetin social “Facebook”, një video nga protesta e djeshme, ku shfaqet një efektiv policie teksa shtyn një qytetar në kohën kur disa protestues po shoqëroheshin në komisariat.
Sipas Metës ky është një skandal që meriton ndëshkim ligjor.
Më tej ai thotë se i fton të gjithë qytetarët të “shndërrohen” në gazetarë dhe të denoncojnë abuzimet dhe dhunën e pajustifikuar, të papranueshme dhe të dënueshme të çdo punonjësi të Policisë së Shtetit.
“SKANDAL QË MERITON NDËSHKIM LIGJOR!
Por nëse nuk do të kishte gazetarë çfarë duhet të ndodhte më keq?!
Duke i përgëzuar të gjithë reporterët për pasqyrimin me objektivitet të protestave qytetare, i inkurajoj të publikojnë me paanësi aktet e paligjshme.
I ftoj gjithashtu të gjithë qytetarët të “shndërrohen” në gazetarë dhe të denoncojnë abuzimet dhe dhunën e pajustifikuar, të papranueshme dhe të dënueshme të çdo punonjësi të Policisë së Shtetit.
Një BRAVO E MADHE për çdo gazetar dhe qytetar që nuk zmbrapset dhe frikësohet nga aktet e dhunës të pajustifikueshme, por i pasqyron ato me guxim.
PROTESTAT PAQËSORE JANË VETË DEMOKRACIA! ”, shkruan Meta.
