Komisioni hetimor i është përgjigjur Presidentit Ilir Meta, i cili ishte i ftuar këtë të martë në seancën e radhës të Komisionit Hetimor i ngritur për shkarkimin e tij për të dëshmuar, por që edhe këtë herë refuzoi të shkonte
Kryetari i komisionit Alket Hyseni propozoi që Presidentit t’i komunikohet që deputetët janë të gatshëm për ta dëgjuar deri të hënën dhe ditën kur mund të paraqitet mund ta zgjedhë vetë kreu i shtetit brenda kësaj periudhe.
“Ky afat ka lidhje dhe me afatin e veprimtarisë së Kuvendit. E kemi të pamundur që përtej ditës së hënë për të zhvilluar veprimtari hetimore. Kuvendi na e ka mandatuar për një afat 3-javor. Duke pasur parasysh që ne duhet të mbyllim hetimin, por edhe të kemi mundësi për të bërë një krehje të plotë të provave, fakteve, apo thënieve të dëshmitarëve dhe më vonë për të krijuar bindjen e plotë, për të marrë vendimin dhe për të garantuar raportin për Kyendin, koha do të ishte e pamjaftueshme dhe për këtë arsye afati maksimal do të jetë ditën e hënë”, tha Hyseni.
Kreu i shtetit i nisi një letër Kuvendit përmes të cilës shpjegonte se Komisioni Hetimor për të hetuar shkeljet e pretenduara nga ana e tij është ngritur me urdhër politik dhe në kundërshtim me ligjin./Opinion.al
