Presidenti i Republiës Ilir Meta ka kthyer për rishqyrtim në Parlament ligjin “Për përfundimin e proceseve kalimtare të pronësisë në Republikën e Shqipërisë”.
Në arsyetimin e tij drejtuar Kuvendit Meta shkruan se e ka mirëpritur qëllimin e këtij ligji për krijimin e bazës ligjore të thjeshtuar e të harmonizuar për përfundimin e proceseve kalimtare administrativo- ligjore të trajtimit të pronës së paluajtshme të shtetit dhe pronës private.
Por pas vlerësimit të dispozitave ligjore të këtij ligji me Kushtetutën, Presidenti ka vërejtur se disa nene të këtij ligji duhen rishikuar.
Sipas Metës disa nene të caktuar të këtij ligji, cenojnë parimin e sigurisë juridike, bien ndesh me dispozita kushtetuese, rrezikojnë të krijojnë tension kushtetues si dhe nuk janë në harmoni me jurisprudencën e Gjykatës Kushtetuese.
Për këto arsye Meta i ka kërkuar Kuvendit të rishikojë edhe njëherë këto dispozita të parashikuara në këtë ligj.
Ky është një nga ligjet e shumta që Meta i ka kthyer Kuvendit gjatë 12 muajve të fundit për rishqyrtim. Nga ana e tij Parlamenti i ka rrëzuar dekretet e Presidentit dhe i ka kaluar ligjet, përvec atij të medias për të cilin është shprehur Bashkimi Europian dhe Komisioni i Venecias. /Opinon.al
