Protokolli i një shteti është shumë i qartë në këtë pikë. Sa herë që lëvizin jashtë vendit krerët e shtetit përkatësisht Presidenti, Kryeministri dhe kryetari i Kuvendit duhet të lajmërojnë paraprakisht Protokollin e Shtetit për lëvizjet e tyre jashtë vendit, në mënyrë që udhëtimet të koordinohen për të mos vakuum në instancat e larta drejtuese. Sa e respektojnë këtë protokoll krerët kryesorë, mjafton të shikosh udhëtimet më të fundit të Kryeministrit Rama dhe Kryetarit të Kuvendit Ilir Meta, njëri në Hong Kong dhe tjetri në Washington. Një situatë e ngjashme me atë të shumë vite më parë kur drejtuesit më të lartë shtetërorë, përkatësisht Presidenti Bamir Topi, Kryeministri Sali Berisha, dhe Kryetarja e Kuvendit Jozefina Topalli, shkelën katër herë brenda një viti kalendarik, protokollin e shtetit, duke udhëtuar jashtë vendit në të njëjtën kohë, duke e lënë shtetin pa drejtues. Detyrë e cila i mbeti zv. Kryeministrit Genc Pollo për një javë, pasi Berisha ishte në Kinë, ndërsa Topalli dhe Topi pushonin. Ky moskoordim u justifikua gjatë asaj kohe për shkak të mungesës së komunikimit institucional që ata kishin, ndërsa nuk dihet se si do të justifikohet këtë herë, aq më shumë kur Rama deklaroi në “Opinion” se ka zero probleme me aleatin e tij Meta
