Tërmeti 6.4 ballë i rënë mëngjesin e sotëm solli pasoja katastrofike në vendin tonë, duke lënë pas viktima, të plagosur dhe dëme të konsiderueshme materiale.
Pas ngjarjes së rëndë, presidenti Ilir Meta, ka shkuar në Durrës, ku u njoh nga afër me situatën e qytetarëve të cilët u prekën nga tërmeti.
Në një prononcim për mediat, Meta u shpreh se vendi sot ndodhet në momente dramatike, ndërsa theksoi se grupet e kërkim shpëtimit po punojnë për nxjerrjen e personave të cilët kanë mbetur nën rrënojat e banesave.
Po ashtu, Meta ka theksuar se puna për gjetjen e qytetarëve do të vijojë, ndërsa ka shtuar se ndihma e Greqisë është diçka pozitive.
“Sot jemi në momente mjaft dramatike për shkak të kësaj fatkeqësie natyrore. Është një fatkeqësi që kërkon angazhim të palodhur sepse ka njerëz nën rrënoja të cilët kërkojnë ndihmë, siç është rasti këtu, ku po bëhen përpjekje të jashtëzakonshme. Është një punë që nuk po bëhet vetëm këtu, por edhe në Kënetë, Thumanë dhe do të vazhdojë edhe në orët në vazhdim. Shpresojmë që së bashku do të arrijmë që të minimizojmë pasojat, që të rikuperojmë më pas këto dëme materiale. Kërkimet do të vazhdojnë, dhe është pozitive që nga Greqia po na ndihmojnë. Puna do të vijojë pa u ndalur,”-tha Meta./ Opinion.al
