Presidenti, Ilir Meta ka dhënë një mesazh për Forcat e Armatosura në kuadër të 107 vjetorit të krijimit të Ushtrisë Shqiptare.
Kreu i shtetit ka shpërndarë në rrjetet sociale një video në të cilën shihen Forcat e Armatosura shqiptare duke u ardhur në ndihmë qytetarëve të cilët u goditën nga tërmetit tragjik i 26 nëntorit dhe shprehu mirënjohje dhe falenderim për çdo grua e burrë që vesh uniformën e Ushtrisë Shqiptare.
Mesazhi i Metës
Me konsideratat më të larta, ju shpreh sot urimet më të ngrohta të gjithë burrave dhe grave në uniformë të Forcave tona të Armatosura, me rastin e 107-vjetorit të Ushtrisë Shqiptare!
Falenderim dhe mirënjohje për kontributet e vyera, përkushtimin heroik dhe sakrificat sublime për mbrojtjen e Atdheut dhe Sigurisë Kombëtare, për operacionet humanitare e paqeruajtëse, si dhe për garantimin e lirisë, paqes e stabilitetit kudo në botë, nën flamurin e NATO-s.
Ky 107-vjetor, i gjen Forcat tona të Armatosura, në krye të solidaritetit dhe ndihmës për vëllezërit e motrat shqiptare të prekur rëndë nga pasojat e tërmetit tragjik, duke spikatur me profesionalizmin, përkushtimin dhe dashurinë për të shpëtuar banorët e mbetur nën rrënojat e kësaj fatkeqësie natyrore shkatërrimtare, që nxorri në pah dhe domosdoshmërinë e modernizimit të mëtejshëm të ushtrisë shqiptare.
Zoti i bekoftë ushtarakët shqiptarë!
Lavdi dëshmorëve që dhanë jetën për Atdhe dhe Flamur! ??
