Presidenti i Republikës, Ilir Meta, të premten, deklaroi se lufta ndaj drogës dhe krimit të organizuar në vendin tonë nuk është një luftë teknike, por politike.
“Nëse do ishte teknike Habilajt do ishin arrestuar nga Zagani, por ishte politike dhe ata nuk u arrestuan. Kjo kërkon një vullnet shumë të fortë dhe nuk është një përgjegjësi e ministrit por gjithë qeverisë”,- u shpreh Presidenti.
Në lidhje me dekretimin e Sandër Lleshit në postin e ministrit të Brendshëm, Ilir Meta u shpreh se nuk paragjykon askënd, por ushtron me qetësi përgjegjësitë që ka Presidenti i Republikës.
“Të gjithë ata që mendojnë se mund të ndikojnë të jenë të qetë se unë nuk ndikohem, përveç bindjeve të mia dhe detyrës që ka presidenti”,-deklaroi Meta.
Presidenti tha se nuk ekziston asnjë arsye që të ndikojnë, por ajo që dua të theksoj pavarësisht profilit që ka kandidati, është tepër me rëndësi për të kuptuar, se lufta me trafikun e drogës dhe krimin e organizuar nuk është një luftë teknike por politike.
