Presidenti i Republikës, Ilir Meta ka bërë sot një apel për reflektim pasi sipas tij liria e medias në Shqipëri është përkeqësuar.
Në Konferencën vjetore të Avokatit të Popullit, “Liria pa urrejtje-Liria e shprehjes përballë të të drejtave të tjera të njeriut”, Presidenti tha se goditja ndaj kritikëve të qeverisë dhe cënimi i lirisë në media janë kambanë alarmi për Shqipërinë.
“Duhet balancë mes gjuhës së urrejtjes dhe lirisë së shprehjes dhe keqpërdorimit për të goditur kritikët ndaj qeverisë. Liria në media është përkeqësuar. Kjo i ktheu ata në protestë. Pronarët po bëjnë edhe kryeredaktorët. Këto janë kambana alarmi ku ndodhet liria e shprehjes në Shqipëri. Shqiptarët nuk duhet të harrojnë diktaturën dhe vuajtjet nga mohimi i kësaj të drejte. Por kambana më e fortë është shpopullimi. Polarizimi politik nxit gjuhën e urrejtjes. Uroj që pas tërmetit të 26 nëntorit të kuptohet se duhet dialog e gjithëpërfshirës”, u shpreh Meta.
Në lidhje me këtë temë foli dhe kreu i Kuvendit, Gramoz Ruçi. Ai theksoi se vetërregullimi i medias nuk ka garanci pa rregullimin e shtetit.
“Demokratizimi i medias dhe i teknologjisë, përveç vlerave dhe dobisë së pallogaritshmë për shoqërinë dhe zhvillimin, përmbajnë në vetvete edhe “farën” e disa rreziqeve. Vetëm një hap e ndan dobinë e këtyre demokratizimeve nga dëmet që mund t’i sjellin shoqërisë dhe qytetarëve përdorimi i papërgjegjshëm i këtyre të mirave publike, “tradhëtimi” prej organeve ose punëtorëve të medias i misionit të tyre fisnik. Që këtej kuptohet sesa i rëndësishëm dhe kritik është vetërregullimi i tregut të medias. Një vetërregullim, i cili nuk mund të garantojë mbrojtjen e të drejtave, lirive dhe dinjitetit të qytetarëve pa plotësimin prej rregullimit prej shtetit. Rregullimet ligjore të nevojshme nuk presupozojnë domosdoshërisht zgjerimin e rrezes së shtetit demokratik, por forcën e tij për të garantuar mbrojtjen e dinjitetit dhe lirive qytetare. Një media nuk mund të jetë e lirë, nëse lexuesit e shikuesit, pra konsumatorët, ndjehen të fyer apo të kërcënuar prej lirisë së saj.”, tha Ruçi. /Opinion.al
