Presidenti Ilir Meta u pyet këtë të martë nga gazetarët nëse ai po sillet si kryetari i opozitës. Për kreun e shtetit i gjithë aksioni që ka marrë është që shqiptarët të mos përplasen.
“Jo kriza është e shtetit të së drejtës dhe presidenti është kryetari i shtetit. Ai ka përgjegjësi për popullin shqiptar dhe për rendin politik. Të marrë çdo përgjegjësi që shqiptarët të mos përplasen. Opozita kërkon Rama ik!, unë thash Edi Reflekto. Opozita kërkoi zgjedhje të përgjithshme bashkë me zgjedhje lokale. Unë kam kërkuar që zgjedhjet vendore të mos zhvillohen pa opozitë. Më duket absurde propozimi i Bashës për të hetuar ato të Dibrës. Tani ti kërkosh Ulsiut të hetojë veten!!. I kam thënë opozitës të mos i shmanget institucioneve. Edhe Milloshevici ka ikur me vota”, tha ai.
Po ashtu Meta ka treguar edhe mesazhin që kryeministri Edi Rama i kishte dërguar, dy ditë pas vendimit të opozitës për të djegur mandatet.
“Lulit i kam shkruar në fund të vitit 2017, se pas zgjedhjeve lokale nuk do të jetë më kryetar partie (e ka gjet kryetarin), ndërsa ty po të shkruaj sot, që pasi të mbarosh mandatin si president nuk do të gjesh më gjurmë LSI-je. Mbase jam gabuar, por më pëlqen të bëj parashikime mbi bazën e analizave të mia dhe përtej të tërave sinqerisht më vjen keq, po të mos qenë gabim.”
“Pra i vjen keq edhe për Lulin, por i vjen keq edhe për mua që nuk do të gjekam më gjurmë LSI-je”, komentoi Presidenti pasi lexoi mesazhin në fjalë ndërsa shtoi se ai mund të bënte një LSI shumë herë më të madhe. Por ky, theksoi Meta, nuk ishte qëllimi i tij.
“Mua kur s’më erdhi keq për gjithë historinë time në Partinë Socialiste, që i dhashë ditët më të mira, në ditët më të vështira, më të zeza, që nuk hynte asnjë njeri atje vetëm 70 vjeç e lart. Mua s’më vjen keq as për LSI-në se e kam bërë për t’i dhënë një mundësi Shqipërisë dhe të gjithë atyre si Gjosha, Panariti etj, që të bëjnë diçka për Shqipërinë. Edhe ai ta dijë mirë se unë në çdo moment bëj një LSI nga 3-4 herë më të madhe se ajo që e kam lënë. Por ky nuk është qëllimi im. Qëllimi im është që të mos e lejoj Edin dhe ata, peng i të cilëve është Edi, që të mos lenë gjurmë demokracie këtu dhe të mos lenë gjurmë Shqipërie këtu, prandaj të thellohet”./ Opinion.al
