Në Ditën e Rinisë, Presidenti i vendit Ilir Meta ka përcjellë një mesazh për të gjithë qytetarët, për rrjetit social FB.
Teksa ka kujtuar me mirënjohje të rinjtë e vitit 1990, që u ngritën për të kundërshtuar një nga sistemet komnunistë më të ashpër në Europën Juglindore, Meta është shprehur ndër të tjera se aspirate e tyre është ende e parealizuar.
Ndonëse nuk është shprehur lidhur me protestën aktuale të studentëve që prej disa ditësh kundërshtojnë tarifat universitare dhe element të tjerë të reformës arsimore, Meta shprehet se inkurajon dhe mbështet rininë e sotme.
Postimi i plotë
Mirënjohje të gjithë studentëve, të rejave e të rinjve, të cilët 28 vite më parë vërshuan në rrugët dhe sheshet e Tiranës, me thirrjen që kumbonte nga gjokset e tyre rinore “E duam Shqipërinë si gjithë Europa” dhe “Liri-Demokraci”, për të shndërruar 8 Dhjetorin në Ditën e tyre, Ditën e Rinisë, Ditën e Lirisë, Ditën e Europës.
Kujtojmë me nderim veprën e Azem Hajdarit, liderit të Lëvizjes Studentore, i cili me guxim, kurajo e shpirt sakrifice frymëzoi ato minuta e orë vendimtare për mijëra studentë, të rinj, pedagogë e intelektualë, për të kthyer në Shqipëri lirinë e munguar.
Jehona e thirrjeve “Liri-Demokraci” dhe e “E duam Shqipërinë si gjithë Europa” të 8 dhjetorit 1990 është ende një aspiratë, jo plotësisht e realizuar.
Inkurajoj dhe mbështes rininë e sotme, veçanërisht studentët, të cilët me shpirtin e tyre të lirë, energjinë, guximin e kurajon e pashembullt të marrin aktivisht pjesë në proceset demokratike për europianizimin e plotë të vendit dhe për ndërtimin e një të ardhmeje të sigurtë të tyre në Shqipëri/ Opinion.al
