Kreu i grupit parlamentar të Partisë Socialiste, Taulant Balla, ka reaguar pas kthimit në Kuvend të ligjit për Policinë e Shtetit nga ana e presidentit Ilir Meta.
Përmes një statusi në rrjetet sociale, Balla ironizon presidentin Meta, duke thënë serioziteti i tij tregohet në takimet me persona të cilët i ka quajtur të kanabizuar, si dhe në marrjen pjesë në festa kolektive në kohë pandemie.
“Presidenti i Republikës kthen ditën ligjin për Policinë e Shtetit, ndërsa Ilir Meta takohet natën me ish-shefa policie që i quante të kanabizuar! Ndërsa mes ditës dhe natës, shkel ligjin për festa kolektive duke u treguar shqiptareve se sa serioz është kur flet për Kushtetute e për ligj”, shkruan Balla.
Më herët presidenti Meta ktheu në Kuvend ndryshimet për ligjin në Policinë e Shtetit pasi sipas tij, ligji krijon hapësira për të gjurmuar dhe mbikëqyrur çdokënd përgjatë procesit zgjedhor.
Ndërsa në vijim të argumentit drejtuar Kuvendit, presidenti u shprehet se:“Policia e Shtetit mund të keqpërdoret për të survejuar kundërshtarët politik të forcës qeverisëse dhe intimiduar qytetarët apo mbështetësit e tyre”./Opinion.al
