Presidenti i Republikës, Ilir Meta, mbrëmjen e sotme, ka folur në lidhje me kërkesën e paraardhësit të tij, Bujar Nishani për të publikuar traskriptet në mbledhjet e Këshillit të Sigurisë Kombëtare, thirrur për situatën alarmante të kanabisit në vend.
Meta u shpreh për Syri.net se nuk është kundra një vendimi të tillë, por kjo duhet vlerësuar me shumë kujdes, pasi mund të kthehet në precedent për çdo mbledhje të Këshillit të Sigurisë Kombëtare dhe kjo më pas mund të dëmtonte seriozitetin e këtij këshilli për të ardhmen.
“Dakord, patjetër. Por, një gjë e tillë duhet të vlerësohet me shumë përgjegjshmëri dhe kujdes, pasi mund të kthehet në precedent për çdo mbledhje të Këshillit të Sigurisë Kombëtare dhe kjo më pas mund të dëmtonte seriozitetin e këtij këshilli për të ardhmen. Unë e kuptoj, kërkesa është normale, por dhe qëndrimi duhet të jetë mjaft i studiuar, sepse ka të bëjë me traditën e Institucionit dhe me vazhdimësinë e tij”,- tha Meta.
Çim Peka: A ka Ilir Meta të njëjtin qëndrim si President me qëndrimin që ka mbajtur në mbledhjen e Këshillit të Sigurisë Kombëtare si Kryeparlamentar? Mbledhje e thirrur nga ish-Presidenti Nishani…
Ilir Meta: Nuk e mbaj mend saktësisht se cili ka qenë qëndrimi, por në thelb ka qenë ky qëndrim. Përsa i takon publikimit që ju po përmendni, një kërkesë e tillë është drejtuar edhe nga gazetarë Institucionit të Presidencës. Nuk ka ndodhur, të paktën në dijeninë time, por edhe të stafit të institucionit që në të kaluarën të jenë bërë publikime të traskripteve të mbledhjeve të Këshillit të Sigurisë Kombëtare.
Peka: Por, edhe nuk ka pasur kërkesa të tilla.
Meta: Ndoshta dhe kjo.
