Kreu i Partisë së Lirisë Ilir Meta ishte sot në qytetin e Elbasanit së bashku me kandidatët e koalicionit “Bashkë fitojmë”, ku ka prezantuar edhe njëherë idetë dhe planet që duan të realizojnë pas zgjedhjeve të 14 majit, nëse vijnë në pushtet.
Gjatë fjalës së tij, Meta theksoi se qeverisja vendore ka qenë një katastrofë e vërtetë si në drejtim të transparencës, si në drejtim të shërbimeve ndaj qytetarëve.
Sipas tij, kandidatët e opozitës nuk kanë kandidatë rivalë dhe i vetmi që iu del është një gogol që njëherë kërcen, njëherë shpik postera sipas overdozave që kalon për shkak të panikut që ka nga zgjedhjet.
“Ka një reagim të jashtëzakonshëm në kryeqytet jo vetëm për zgjidhjen e transportit urban, por dhe sa i takon ideve fantastike dhe shumë të thjeshta, por edhe të përballueshme të kostove të tyre nga superkandidati ynë për Tiranën Belind Këlliçi.
Ndërkohë kemi plane të shkëlqyera nga kandidatit tjetër në Durrës, z Igli Cara. Angazhimi i tij gjithashtu për të adresuar më mirë nevojat jetike të ish-komunave të harruara totalisht si rezultat i gjoja reformës së ideuar nga Edi Rama, e cila solli një katastrofë për sa i takon shërbimeve që merrnin qytetarët.
Kudo është interesi te njerëzit. Si t’u lehtësohen hallet e shqetësimet atyre. Si të mbështeten ata që janë më në vështirësi. Unë besoj shumë që kandidatët tanë me këtë komunikim të përditshëm për qytetarin dhe me këtë fokus të tyre të përditshëm për të zgjidhur dhe lehtësuar këto halle, jo vetëm janë fitues dhe udhëheqin bindshëm këtë garë, por për fat të keq nuk kanë kandidatë rivalë.
I vetmi që iu del është një gogol që njëherë kërcen, njëherë shpik postera sipas overdozave që kalon për shkak të panikut që ka nga zgjedhjet që po vijnë dhe nga fakti që e ka të pamundur të trukojë ndeshjen si herën e kaluar. Këto janë zgjedhje shumë të rëndësishme ndaj duhet që qytetarët të marrin pjesë dhe të tregojnë përgjegjshmëri për të drejtat e tyre që ua jep Kushtetuta dhe nuk i kanë shfrytëzuar si duhet, por këtë radhë është dhe detyrë patriotike”, tha Meta./Opinion.al
