Presidenti Meta deklaroi në një konferencë për mediat se do të firmosë në momentin më të parë Reformën Zgjedhore të arritur me konsensus mes palëve.
Meta tha se kjo reformë do të verifikohet se sa serioze është kur të zhvillohen zgjedhjet në terren. Ajo që ra në sy ishte se presidenti nxiti palët të arrinin konsensus për këtë reformë të kërkuar me ngulm nga Bashkimi Europian pa përmendur partnerët amerikanë.
“Mezi pres që palët të mbajnë fjalën dhe në 31 maj të përmbyllin me konsensus në këtë tryezë të këshillit politik të gjitha ndryshimet që kërkohen me ngulm nga BE por edhe partnerët e tjerë dhe menjëherë si President do ti firmos ndryshimet sapo të vijnë që të japim një lajm të mirë të paktën nga Tirana, për qytetarët por sidomos për partnerët. Por serioziteti i tyre duhet te verifikohet nga zgjedhjet ne terren” tha ai.
Nuk dihet nëse mos përmendja e SHBA si partner që ka kërkuar konsensus ka lidhje me deklaratat e ambasadores Kim për Reformën në Drejtësi dhe me akuzat e presidentit për ndërkombëtarët. Mes të tjerash, Presidenti Meta e trajtoi edhe me nota ironie punën e Këshillit Politik për Reformën ndërkohë që vuri theksin se ajo duhet të votohet me konsensus.
“Unë kam qenë i parashikueshëm, se mendoj se këtu dalloj nga aktorët e tjerë, qofshin vendas, apo shqipfolës. Duhet të keni të qartë këtë gjë. Siç ju kam thënë vjet këtu që nëse nuk bëhen zgjedhje lokale gjithëpërfshirëse Shqipëria do të ngelë në klasë, por do të marrë në qafë edhe Maqedoninë e Veriut dhe e mori në qafë, se është kriteri i Kopenhagenit, ato ekzistojnë dhe u shtuan kushte të reja. Dekretet për zgjedhjet: unë shpresoj shumë, jam, i entuziazmuar, nga gjithë cicërimat. Mezi po pres ta duartrokas dhe kudo të jem do kthehem njëherë këtu që ta firmos dhe të lajmërojmë gjithë botën që kjo është arritje shumë e madhe. Tani e zëmë se palët nuk ranë dakord, nuk e dëshiroj, por do të shoh nëse miratohet në mënyre të njëanshme, mundësi ime është ta kthej njëherë për reflektim për çdo rast. Pastaj si veprohet është në varësi të aktorëve të tjerë, por në çdo rast, me konsensusin, por edhe të njëanshme që nuk do të habiteshim se këtu ka zhvillime të befasishme. Përsëri si president i republikës do të bëj të qartë që në hapësirën kohore që kodi të më lejojë, do të shpall ditën e ardhshme të zgjedhjeve dhe nuk do të bëj asnjë konsultim formal me asnjë forcë. Se të gjithë mezi presin një parlament të ri plotësisht legjitim, por edhe sadopak më legjitim le të jetë sesa ky që është. Kjo do të thotë që të kemi të qartë që nëse kodi nuk miratohet me konsensus, zero, çeljesh negociatash të vendit me BE, jo deri në zgjedhjet qe vijnë, por edhe pas tyre. Ecni në këtë rrugë konsensusi se kjo është rruga e mirë, kemi edhe kryesimin e radhës së OSBE dhe do të ishte turp i madh që vendi veç ngjarjeve me TK dhe mediat, Shqipëria të mos përmbushë rekomandimet e OSBE ODIHR-it. Firmoset dekreti, nuk kthehet me prapa. Kush te doje te hyje ne zgjedhje, kush te doje te dale”, u shpreh Presidenti.
Më tej Meta deklaroi se ai do të angazhohet më pak “me Tiranë politike dhe do i kushtojë më shumë kohë qytetarëve të Shqipërisë“. Ai paralajmëroi gjthashtu konferenca të përjavshme për të bërë transparente punën e tij si dhe të jepte vlerësimin për çështje me interes publik. /Opinion.al
