Kryetari i Partisë së Lirisë Ilir Meta ka zhvilluar këtë të shtunë një takim me të rinjtë e partisë që ai drejton.
Gjatë fjalës së tij teksa theksoi rolin e rëndësishëm që të rinjtë kanë, Meta u shpreh se në zgjedhjet lokale gjysma e kandidatëve në Këshillin e Bashkisë së Tiranës do të jenë të rinj. Në këtë mënyrë sipas ish-Presidentit të drejtat e tyre nuk do të nëpërkëmben.
“LRI ka një rol shumë të rëndësishëm në këtë aspekt. Kemi pasur një debat që kur të kemi PL si do bëhet me Lëvizjen Rinore. LRI është një nga gjërat më të bukura e pozitive që Shqipëria ka pasur në 30 vite i ka dhënë frymëzim të rinjve e duhet të vazhdojë jo për shkak të trashëgimisë pozitive të së kaluarës, por edhe për potencialin e jashtëzakonshëm për tu rikthyer shumë herë si zëri i fuqishëm i të rinjve e të rejave. Për këtë kërkohet mbështetje nga ne. Kam qenë e do mbetem mbështetësi më i madh i të rinjve.
Para kemi një betejë të rëndësishme siç janë zgjedhjet. Tirana është sheshbeteja, sepse nëse nuk vjen ndryshimi nga Tirana nga do të vijë. Nëse rrudhja nga të rinjtë ndjehet edhe në Tiranë, imagjinoni si është në qytetet e tjera ku nuk ka fare të rinj. Ka qytete në Shqipëri që ka më shumë mësues se sa nxënës. Të rinjtë do kenë zërin e rëndësishëm në Këshillin e Bashkisë së Tiranës, gjysma e kandidatëve do jenë të tillë që të drejtat e tyre të mos nëpërkëmben më”, tha Meta./Opinion.al
