Një ditë pas manifestimit përpara godinës së kryeministrisë dhe presidencës, Meta ka falenderuar pjesëmarrësit.
Në një postim në Facebook, Presidenti Meta shkruan se dje u hodh hapi i parë në rivendosjen e sovranitetit të popullit shqiptar ndaj institucioneve
“Një falenderim të përzemërt të gjithë motrave dhe vëllezërve shqiptarë, të cilë iu përgjigjen thirrjes së Presidentit të Republikës në mbrojtje të Kushtetutës dhe kundër grushtit të shtetit që synon rrëmbimin mafioz të Gjykatës Kushtetuese. Dje hodhëm hapin e parë në përmbushjen e misionit tonë për rivendosjen e sovranitetit të plotë të popullit shqiptar ndaj të gjitha institucioneve”, shkruan Meta.
Në manifestimin e djeshëm, Presidenti denoncoi përpara turmës së njerëzve të mbledhur shkeljen e Kushtetutës. Ai firmosi dekretin që kthen ligjin për ndryshimin e procedurës së betimit të anëtarëve të Gjykatës Kushtetuese. Meta paralajmëroi gjithashtu se ai do të firmoste dekretin për shpërndarjen e Parlamentit brenda në Kuvend pas 15 marsit.
Të pranishëm në tubimin e djeshëm ishin mijëra qytetarë si dhe liderët e partive opozitare.
Kryeministri Rama nga ana e tij preferoi të ironizonte me thirrjen e Metës për shpërndarjen e parlamentit duke thënë se ai mund të vendoste t’i shpallte luftë SHBA por kjo të rrëzohej në Parlament dhe shtoi se Meta nuk e shpërndan dot atë.
Për manifestimin e Presidentit Meta reagoi edhe ambasadorja e SHBA, Yuri Kim e cila shkroi në Tëitter se ishte suprizuar nga prania e flamurit amerikan gjatë tubimit dhe theksoi se vendi i saj nuk kishte të bënte me këtë organizim. /Opinion.al
