Deputeti i Partisë Demokratike Belind Këlliçi ka folur për protestën e 7 korrikut të thirrur nga Sali Berisha.
Gjatë një interviste në “News 24”, Këlliçi është shprehur se “ka ardhur momenti të bëjmë opozitën dhe opozita bëhet kundër qeverisë”.
Deputeti shprehu shqetësimin për faktin se shumë të rinj po largohen nga Shqipëria, përveç tyre edhe shumë profesionistë në fusha të ndryshme.
Këlliçi theksoi se në protestën e 7 korrikut do të ketë surpriza, ndërsa ka folur dhe për presidentin Ilir Meta dhe LSI.
“Qytetarët dalin për veten e tyre, për ekonominë e tyre. Nëse janë më mirë se para 10 vitesh, le të mos dalin në protestë. Por është momenti që shqiptarët të çohen në protestë për të mirën e tyre. Qëllimi i protestës është për t’i shkurtuar ditët Edi Ramës. Ka ardhur momenti të bëjmë opozitën dhe opozita bëhet kundër qeverisë, kundër kryeministrit dhe kundër kësaj qeverie që është në mandatin e tretë. Është një protestë për të rikthyer PD në binarët e opozitarizmit. Çdo opozitar që është votëbesuar, aq më tepër ata që kanë marrë mandat deputeti, po bëjnë detyrën e tyre. Pak rëndësi ka e thërret Beisha, Alibeaj, Basha, etj, por protesta është lajm i mirë. Pashë sot një reagim të Alibeajt, që më duket në kufijtë e absurdes. Të bësh thirrje për të mos marrë pjesë në protestë, më duket jo normale dhe shërbim ndaj qeverisë. Për këtë më vjen keq, që ka kolegë që në vend që të bënin thirrje për t’iu bashkuar protestës, po bëjnë dëm. Edhe të majtët mund të dalin në protestë, edhe ata e paguajnë naftën njësoj si ne. E keni parë tre ditët e fundit, që ka pasur një ulje të vogël të çmimit të naftës. Pra, një mini sinjal është dhënë. Nëse Berisha ka thënë që do kthejë opozitarizmin e vërtetë dhe se opozita nuk ka pushime, atëherë nuk na bën përshtypje pse protestojmë në korrik. Jemi në rrezik për shkak të shpopullimit. Shifrat janë tronditëse, alarmante. Ta them sinqerisht që Shqipëria po boshatiset. Dje isha në Përmet, bëra një takim me maturantë, ku nga 22 që kisha në takim, 100% e tyre donin të largoheshin nga Shqipëria. Të njëjtat shifra janë dhe në kryeqytet, sa i takon të rinjve që duan të ikin. Nuk kemi më një emigracion për të mbushur barkun me bukë, por një emigracion për të siguruar jetesën. Neve po na ikin mjekët, ekspertët, inxhinierët. Nëse vazhdohet me këto ritme, në këtë vend nuk do të mbetet askush. Për këtë arsye, duhet të ndalojmë dhe të mendojmë për vendin tonë. Protesta është një edukatë e qytetarëve, ndjesi e brendshme e ndërgjegjësimit të qytetarëve, që duhet të ngrihen për të rrëzuar qeverinë”,-tha Këlliçi.
Po LSI e Ilir Meta?
Neve na kërkojnë llogari pse u bë në korrik dhe jo në qershor, pse në mesjavë dhe jo në fundjavë, tani po na kërkojnë dhe për LSI e Ilir Metën. Ilir Meta dhe LSI aty janë . E kanë konfirmuar publikisht që do të jenë aty. Edhe unë dal në protestë si qytetar, para se të dalë si deputet. Është një kulturë qytetare të dalësh në protestë dhe është një kulturë që duhet kultivuar te shoqëria jonë, te brezi i ri./Opinion.al
