Në kuadër të fushatës botërore kundër dhunës që nis më 25 Nëntor, Presidenti i vendit Ilir Meta përmes një postimi në Facebook, ka shkruar se nuk do të amnistojë asnjë të dënuar për vepra penale të dhunës në familje.
Meta shprehet kështu në një kohë shumë pranë festiave të fundvitit, ku sipas traditës, Presidenti zakonisht ushtron kompetencën e tij për amnisti në raste të caktuara te denuarish.
Në postimin e tij të sotëm, Meta njofton se institucioni i presidencës do të ngjyroset në portokalli, ngjyra simbol e fushatës kundër dhunës me bazë gjinore.
Postimi i plote
Dhuna fizike e verbale ndaj grave dhe vajzave është dobësi! Nuk është burrëri! Është një plagë e shenjë turpi për shoqërinë, një pengesë e madhe për zhvillimin gjithëpërfshirës, të barabartë dhe të qëndrueshëm.
Në Ditën Ndërkombëtare për Eliminimin e Dhunës ndaj Grave dhe Vajzave i bashkohem fushatës botërore “Ta ngjyrosim botën portokalli” duke i dhënë sot në mbrëmje këtë ngjyrë Institucionit të Presidencës.
Përsëris qëndrimin tim të palëkundur për të mos amnistuar asnjë të dënuar për vepra penale të dhunës në familje.
