Sot të gjithë janë me sytë nga Kombëtarja, ndërkohë që djemtë kuqezi po kalojnë një moment të vështirë pas humbjes me Francën. Pas mesazhit të kreut të FSHF-së, Armando Duka se të gjithë duhet të jenë pranë ekipit Kombëtar në momente të vështira, sidomos tifozët VIP, duket se kanë reaguar këta të fundit.
I pari që u përgjigj ishte Presidenti Ilir Meta, i cili konfirmoi se do të jetë në stadiumin “Elbasan Arena”, në mbështetje të kuqezinjve për ndeshjen me Islandën.
Pak orë më pas, Kryeministri Edi Rama vendosi t’i bënte një vizitë surprizë Kombëtares. Kreu i qeverisë bisedoi me trajnerin Edy Reja dhe u takua në fushë me të gjithë futbollistët, të cilëve u shprehu besim te arritja e një rezultati pozitiv.
Më pas Rama postoi një mesazh në rrjetet sociale teksa shkruante se: “Kur fitojnë mbajnë radhë të të tregojnë sa të duan, kur humbet e ke ti radhën t’u tregosh se sa vlen. Gjithnjë kuqezi”.
Në fakt ky takim i Ramës vjen dhe pas një tjetër zhvillimi me lojtarët e Kombëtares. Futbollisti Andi Lila ka denoncuar heqjen e pasaportave diplomatike për lojtarët e kombëtares që ishin pjesë e ekipit që luajti në Kampionatin Europian të vitit 2016.
Pasaportat iu dhanë futbollistëve me motivacionin për arritje historike dhe promovimi që i bënë vendit. Megjithatë ministri i Jashtëm në Detyrë, Gent Cakaj, ka marrë vendimin për heqjen e tyre./ Opinion.al
