Këtë të hënë nis zyrtarisht viti i ri shkollor. Edhe pse, nga 1 shtatori, është zhvilluar mësimi plotësues për të rikuperuar njohuritë e humbura për shkak të mësimit online, nxënësit nuk kanë qenë të detyruar për të shkuar në shkollë.
Mësimi sot do të fillojë në orën 08:00 dhe orët do të jenë nga 30 minuta, masë e marrë për të reduktuar qëndrimin në një ambient të mbyllur për orë të gjata, për shkak të pandemisë Covid-19.
Po ashtu, stafi mësimor si dhe nxënësit duhet të zbatojnë masat anti-COVID, ku janë të detyruar të respektojnë distancimin social, të mbajnë maskat si dhe ambientet duhet të ajrosen vazhdimisht.
Në shkollat ku është e pamundur të respektohet distancimi social, mësimi do të zhvillohet me turne.
Sa i takon mësuesve, ata duhet të jenë të vaksinuar, ndërsa për ata që nuk e kanë kryer vaksinën kundër Covid-19, do të duhet të paraqesin test COVID çdo javë për të treguar se nuk janë të infektuar me koronavirus./Opinion.al
