Një ngjarje e rëndë ndodhi një javë më parë në Greqi, ku Fatmir Talellari, 50 vjeç vrau kunatin, Erjon Pelivani, 33 vjeç pasi ky i fundit abuzonte me vajzën e tij prej 9 vitesh. Ka qenë vajza, e cila tashmë është 18 vjeçe, që ka rrëfyer gjithçka dhe se si e shantazhonte Pelivani.
Talellari e kishte vajzën me gruan e parë e cila kishte ndërruar jetë disa vite më parë. Me të kishte edhe dy vajza të tjera. Ndërsa disa vite më vonë ishte martuar me një grua tjetër, motrën e Erjon Pelivanit me të cilën kishte edhe një djalë.
Kjo ngjarje kaq e rëndë dhe tragjike ka marrë vëmendjen e opinionit publik në Greqi dhe jo vetëm. Këtë të mërkurë në emisionin “Opinion” në Tv Klan u fol pikërisht rreth kësaj çështje. E ftuar në studio ishte edhe Blerina Bombaj e cila tha se e justifikon reagimin e babait të vajzës dhe mendon se nuk është vrasje, por vetëmbrojtje.
Sipas saj, babai është shokuar kur ka mësuar se për 9 vite shpirti i vajzës së tij “derdhte gjak”.
Blendi Fevziu: Blerina kishe idenë që babai duhej të reagonte ashtu?
Blerina Bombaj: Unë nuk mund të gjykoj si duhet të reagonte, por unë e justifikoj reagimin e tij. Nuk mendoj që kjo është vrasje kjo është një vetëmbrojtje sepse mendo sikur ti të hysh në një dhomë dhe të shikosh një dhunues që është duke dhunuar fëmijën tënd. Nuk do ta vrasësh dhe drejtësia nuk do të japë të drejtë? Do të japë të drejtë, sepse është vetëmbrojtje. Në këtë rast ai realizon që për 9 vite, fëmija i tij që është gjëja më e shtrenjtë dhe për të cilin jeton e punon përditë, të cilën e rrit pa nënë dhe ka pasur një fatkeqësi më përpara dhe ia besoi një gruaje tjetër dhe krijoi familje me një grua tjetër, mëson që për 9 vjet shpirti i saj derdhte gjak. Pra një fëmijë që abuzohet 9 vjeç dhe 12 vjeç përdhunohet është i vdekur shpirtërisht. Është një invalid i përjetshëm. Psiqikisht ai fëmijë nuk e merr dot më veten kurrë nga një aspekt që është aspekti më i rëndësishëm i vetes që është dashuria dhe besimi.
