Kushtet tregtare mes dy vendeve, por edhe reforma në Administratën Publike kanë qenë në fokus të bisedimeve që Zv.Kryeministrja e Shqipërisë Senida Mesi, ka mbajtur gjatë një takimi në Malin e Zi.
Mesi është pritur nga Ministrja për Administratën Publike Suzana Pribilović dhe Zëvendëskryeministri Milutin Simović.
Me Ministren Pribilović është diskutuar kryesisht për nevojën e shkëmbimit të përvojave reciproke mes dy vendeve në fushën e administratës publike dhe asaj të shërbimeve publike.
Ndërkohë, gjatë takimit me homologun malazez, Znj. Mesi u ndal tek projektet me interes të ndërsjellë mes dy vendeve dhe më konkretisht, mbi negocimin e kushteve tregtare mes Shqipërisë dhe Malit të Zi, si dhe mbi veprimet konkrete që duhen ndërmarrë për liqenin e Shkodrës dhe lumin Buna, në kuadër të marrëveshjes së nënshkruar në mbledhjen e përbashkët të dy qeverive lidhur me menaxhimin e burimeve ujore ndërkufitare.
