Në kuadër të fushatës 16 ditore kundër dhunës me bazë gjinore, Zëvendëskyeministrja e Republikës së Shqipërisë Senida Mesi zhvilloi sot një seri aktivitetesh në Elbasan me grupe të grave dhe organizata që janë mbështetur ndër vite nga “UN Women” në Shqipëri.
Mesi u takua me gra nga zonat rurale të Elbasanit dhe gra që i përkasin grupeve të margjinalizuara, takim në të cilin u diskutuan nevojat dhe sfidat e tyre. Në të njëjtën kohë, Mesi u njoh nga afër edhe me disa produkte lokale të cilat prodhohen nga vetë këto gra në zonat e tyre.
Ajo mori pjesë edhe në themelimin e Aleancës së Grave Këshilltare të Qarkut të Elbasanit. Në Shqipëri janë krijuar 21 aleanca të grave këshilltare të cilat mbështesin barazinë gjinore dhe fuqizimin e grave në vendimmarrje. Përfaqësuese të këtyre aleancave të pranishme në takim prezantuan arritjet e deritanishme dhe sfidat në përmbushjen e objektivave të tyre.
Në fjalën e saj gjatë këtij takimi, Mesi e vuri theksin në rëndësinë që ka fuqizimi ekonomik dhe intelektual i grave dhe vajzave për pavarësinë e tyre dhe luftën ndaj dhunës.
“Kur flasim për ndihmë të grave dhe vajzave, shkon në dy drejtime sipas mendimit tim: për të bërë më shumë për edukimin e tyre e për emancipimin e tyre, si dhe për t’u krijuar atyre më mundësi punësimi apo biznesi. Kjo kërkon investim nga qeverisja vendore dhe qendrore, për të krijuar iniciativa me tarifa të reduktuara në kopshte apo çerdhe për gratë kryefamiljare, mundësi për kurse trajnimi, shkolla profesionale e pse jo edhe universitete. Për gratë në zonat rurale, kërkesat më të mëdha shkojnë në përmirësimin e infrastrukturës, ngritjen e pikave të grumbullimit ku gratë në atë ekonomi familjare ku punojnë të kenë mundësi të shesin produktet e tyre. Rritja ekonomike dhe pavarësia ekonomike ndihmon pozitivisht edhe tek lufta ndaj dhunës. Një grua ose një vajzë në momentin që punësohet ka më shumë shanse për pavarësi ekonomike. Një grua e shkolluar di ku të trokasë për të kërkuar fonde, grante, kredi të buta. Ka më tepër mundësi të zhvillojë një biznes dhe është më tepër në gjendje për t’i thënë jo edhe dhunës”, tha Mesi.
Zëvendëskryeministrja Mesi përmendi gjithashtu edhe rëndësinë e përfaqësimit të lartë që gruaja ka në këshillat bashkiakë apo në qeveri prej vitit 2015.
Vizita përfundoi në strehëzën e emergjencës për të mbijetuarat e dhunës në familje që drejtohet nga Forumi i Gruas Elbasan.
