Jose Mourinho ka postuar një mesazh të stilit të lartë për Claudio Ranierin, pasi trajneri italian u shkarkua nga stoli i Leicester City. Kampionët e Premier League e dhanë njoftimin të enjten në mbrëmje, një ditë pasi u mundën 2-1 nga Sevilla, në Ligën e Kampionëve. Pas fitores së tyre mjaft të jashtëzakonshme të titullit, sezonin e kaluar, skuadra e Ranierit ka luftuar në sezonin 2016-2017 për të gjetur veten. Ajo ndodhet në vendin e 17-të të renditjes, me vetëm pesë fitore në kampionat, në 25 ndeshje. Leicester u eliminua edhe nga “FA Cup” prej Millwall, ndaj hierarkia e klubit vendosi të largojë trajnerin.
Suksesi i sezonit të kaluar i Ranierit, që e pa atë të kurorëzohej trajneri më i mirë i vitit nga FIFA, nuk është harruar, megjithatë, kolegu te Manchester United, Jose Mourinho, ia ka dërguar një mesazh mbështetës. 54-vjeçari portugez, i cili, si Ranieri, është shkarkuar sezonin pasi kishte pretenduar titullin e Premier League, ka postuar një mesazh vlerësues në faqen e tij në Instagram, për të kujtuar se italianit askush nuk mund t’ia fshijë arritjet: “Kampion i Anglisë dhe trajneri i vitit nga FIFA, i shkarkuar. Ky është futbolli i ri, Claudio. Vazhdo të buzëqeshësh miku im. Askush nuk mund ta zhbëjë historinë që ke shkruar!”/ Telesport.al
