Tirana, zemra politike dhe kulturore e Shqipërisë, është një qytet që lëviz me ritmin e një kohe që ndryshon çdo ditë. Një mozaik i arkitekturës, historisë dhe jetës urbane, i ndërtuar mbi kontraste, por gjithnjë i gjallë. Kështu shfaqet Tirana nën fokusin e kamerës së agjencisë së lajmeve Reuters.
Sheshi Skënderbej, dikur pika e takimeve të thuajse çdo qytetari që vizitonte kryeqytetin, është sot pika ku kryqëzohen historia dhe përditshmëria. Dikur vetëm me bustin e heroit tonë kombëtar mbi kalë, një simbol i qëndresës dhe krenarisë, sot ndërtesat rreth tij tregojnë hovin me të cilin qyteti po ndryshon.
Në krah, xhamia e Et’hem Beut mbetet një ndër dëshmitë më të vjetra të trashëgimisë osmane. Bashkë me Katedralen e Kishës Ortodokse përbri saj, dëshmojnë edhe vlerën e rrallë të bashkëjetesës fetare.
Pak më tutje, Kalaja e Tiranës është shndërruar në destinacion turistik, një hapësirë për takime, kafene, art, kulinari dhe zeje. Mes rrënojash të lashta dhe strukturash të restauruara, ajo është kthyer në një oaz të qetë mes ritmit urban, por mbetet një kujtesë se e kaluara është gjithmonë aty. Mes të resë dhe të vjetrës qëndrojnë edhe ndërtesat e institucioneve, nga Presidenca, Kryeministria dhe Bashkia, duke treguar rrugëtimin historik të shtetit shqiptar.
Është një kombinim i ndikimeve italiane, komuniste dhe moderne që ka krijuar një peizazh arkitekturor të veçantë, karakteristik vetëm për Tiranën. Bulevardi “Dëshmorët e Kombit”, i ndërtuar në vitet ’30 nga arkitektët italianë, vazhdon të mbetet boshti kryesor i qytetit. Në krah, Piramida, e transformuar në një qendër edukimi dhe teknologjie, mbetet simbol i një qyteti që e ripërkufizon veten vazhdimisht.
Stadiumi Kombëtar “Air Albania”, një nga më modernët në rajon, jo vetëm shfaq ambicien sportive dhe dinamizmin e qytetit, por është shndërruar në një prej zonave më të frekuentuara nga çdo moshë. Si provë e ndërthurjes së historisë me modernen, dhe se Tirana nuk ka frikë të eksperimentojë me identitetin e saj vizual, qëndron edhe kërpudha gjigante në oborrin e Kryeministrisë.
Pazari i Ri është një tjetër kombinim i këtij mozaiku, ku tradita takohet me modernen. Tirana është një vend që nuk fle, që sfidon vetveten dhe që po përpiqet të bëjë paqe mes së djeshmes dhe së nesërmes.
Duket sikur është papushim në lëvizje dhe vijon të shkruajë çdo ditë historinë e saj. Tv Klan
